(Update) CAGAYAN DE ORO CITY – Gimando ni City Mayor Oscar Moreno kang City Police Director Col Aaron Mandia ang dinalian nga pagsulbad sa pagpusil-patay sa kamagulangang anak lalaki ni mayoralty candidate Cagayan de Oro 1st District Rep Rolando ‘Klarex’ Uy nga si Carmen Brgy Kag Roland Sherwin ‘Tawee’ Uy.
Kini human dul-iti’g pusil sa wala mailang motorcycle in tandem suspects gamit ang kalibre 45 nga armas sa ilang family owned quarry business site sa Zone 1,Sitio Camarahan,Brgy Pagatpat ning syudad kagahapon sa udto.
Miingon si Moreno nga isip usa usab ka amahan,gisakitan kini pag-ayo sa gidangatan sa pamilyang Uy tungod sa kalit nga kamatayon ni Tawee ug quarry caretaker niini nga si Samuel Talaban nga pulos molopyo sa Brgy Carmen sa dakbayan.
Gihangyo usab sa mayor si NBI-10 regional director Atty Patricio Bernales nga mohimo sa kaugalingong imbestigasyon aron matudlo ang tinud-anay nga mga responsable sa ug motibo sa pagpapatay sa mga biktima.
Una nang dunay nagpatoo nga customer nga gusto magpalit sa grabas ug balas sa mga biktima apan pagpatay ang tuyo kanila kagahapong adlawa.
Samtang gikompirmar ni SOCO 10 medico legal officer Capt Paulo Benedicto Acosta III nga ang daghang samad pinusilan gamit ang gitoohang kalibre 45 nga armas ang diha-diha gikamatyan ni Uy ug ni Talaban.
Miingon si Acosta nga nagbaton si Tawee sa unom ka igo samtang duha usab kang Talaban hinungdan sa ilang kamatayon.
Gibutyag sa opisyal nga naka-rekober usab sila sa crime scene sa walo ka empty fired cartridges ug upat ka deformed bullets.
Nasuta usab nga pulos nakalitan ang mga biktima sa pag-atake sa mga suspek samtang naanghelan ang driver ni Tawee nga si Rubie Alayuay kay nakatago kini sa pansayan sa dihang natigayon ang kremin.
Samtang wala wad-a sa Police Regional Office 10 ang anggulo nga tungod sa politika,may relasyon sa iyang trabaho o bangi sa negosyo ang posibleng hinungdan sa pagpapatay kang Uy.
Gibutyag ni PRO 10 spokesperson Lt Col Michelle Olaivar nga bisan sila ang mikondinar sa linu-og nga binuhatan ug nanganti pagkab-ot sa dinaliang hustisya alang kamatayon ni Tawee ug Samuel Talaban kinsa nagbaton sa lain-laing mga pinusilan sa ilang kalawasan kagahapon sa udto.
