CAGAYAN DE ORO CITY – Nadakpan sa National Bureau of Investigation o NBI-Iligan City ang duha ka mga suspek nga gabuhat ug gapamaligya sa online voter’s identification cards nga gina-isyu sa Commission on Elections.
Giila ni NBI-Iligan District Office head Atty Abdul Jamal Dimaporo ang mga suspek nga sila si Rajiv Cali, 30-anyos, residente sa Marawi City ug Sittie Ainah Hadj Nasser, 29-anyos.
Si Dimaporo miingon nga nakadawat sila’g reklamo gikan kang Lanao del Norte provincial election supervisor Atty. Joseph Hamilton Cuevas nga imbestigaran ang usa ka Facebook user nga gapamaligya sa mga peke nga voter’s ID sa kantidad nga P1,500.00.
Moabot sa 13 ka mga voter’s ID nga ipadala sa Luzon ang narekober sa mga operatiba atol sa entrapment operations.
Nag-atubang karon sa kasong pagsupak sa Cybercrime Prevention Act and Data Privacy Act ug estafa ubos sa Revised Penal Code ang mga suspetsado.
