CAGAYAN DE ORO CITY-Nasikop sa entrapment operation sa PNP-Anti Cyber Crime Region 10 ang nagpatoo nga talent manager nga mihimo pag-blackmail sa usa ka babayeng modelo sulod sa Middleton Appartelle sa Brgy Carmen sa syudad kagabii.
Giila ang suspek nga si Renan Ranile nga taga-Brgy Iponan sa dakbayan.
Gibutyag ni PO3 Ritchelle Maniabo sa PNP-Anti Cyber Crime Unit Region 10 nga nagbahad ang suspek nga ipagawas sa social media ang hubo nga lawas sa biktima hinungdan nga nagpatabang kini kanila.
Kini ang hinungdan nga gidani sa biktima nga magkita sila sa maong lugar bugti sa paghilawas hinungdan sa pagkasikop sa maong suspek.
Nasuta nga usa ka seaman ang suspek ug nag-alyas sa pangalan dihang gi-blackmail niini ang wala panganli nga biktima pinaagi sa social media.
Samtang natintal tungod sa gipadala nga mga hubo nga hulagway hinungdan nga gitumpangan sa nagpaila nga talent manager ang babaye nga modelo.
Kini ang pag-depensa ni Ranile dihang mga pulis na ang misugat kaniya sulod sa Middletone Appartelle ning syudad kagabii.
Namugos si Ranile nga nahagit lamang siya sa biktima tungod sa mga pasumbingay niini ug pagpadala’g mga seksi nga mga hulagway hinungdan nga sila nagkakita sa maong lugar kagahapong adlawa.
