CAGAYAN DE ORO CITY – Mihinay pagsamot ang paningkamot nga mahulipan ang unitary form of government padulong sa sistemang pederalismo ang nasud.
Kini ang reaksyon ni kanhi Cagayan de Oro City Mayor Atty Reuben Canoy sa kamatayon sa federalism advocate nga si former Senate President Aquilino ‘Nene’ Pimentel Jr tungod sa gihambin nga balatian.
Gibutyag sa Bombo Radyo ni Canoy nga kang Pimentel sila mikuha’g kusog aron magpadayon ang paghingusog sa pederalismo nga unang prioridad ni Pangulong Rodrigo Duterte.
Sulti ni Canoy nga nawad-an ang nasud sa bayani pinaagi kang Pimentel nga walay laing tuyo nga mao ang pagpalambo sa kahimtang sa katawhan.
Si Pimentel ang vice chairman sa giporma ni Duterte nga constitutional consultative committee samtang si Canoy ang miyembro niini aron pormahon ang sugyot nga mahimong unod sa draft sa federal government.
