CAGAYAN DE ORO CITY – Gikalipay pag-ayo sa pamilya Pimentel ang grabeng pagmahal nga gipaabot sa katawhan ngadto kang kanhi Senate Pres Nene Pimentel Jr.
Kini human nabati ni Gng Lourdes ‘Bing’ Pimentel ang kainit sa simpatiya sa publiko samtang anaa sila sa kasub-anan.
Siya miingon nga maoy nakahatag kalig-on sa ilang mga pagbati ang pagpasubo sa katawhang Pilipinhon tungod sa nahatag nga serbisyo publiko ni Pimentel alang sa nasud.
Si Gng Pimentel ang buhing saksi kon giunsa paglahutay sa iyang kapikas ang pagpanglutos kaniadto sa ilang pamilya sa rehimeng Marcos.
