Kinahanglan dayong maghimo og hearing sulod sa 24 oras ang Department of Labor and Employment aron marepaso ug matul-id ang kakulangan sa operasyon sa Philippine Sanjia Steel Corporation human kini mapasirado ug ma-under investigation, sumala ni Atty. Sonny Matula sa Federation of Free Workers.
Matud sa abogado, kon occupational safety ang basehan sa pagpasira sa planta, kinahanglan paspason sa DOLE ang pagrepaso aron dali usab nga mahibal-an ang mga kakulangang kinahanglan ayuhon sa management.
Dugang pa ni Matula, bisan kapin 100 ka mga tawo na ang gi-eksamin sa Department of Health, wala pa matud pa’y nakitang radioactive effect nga nakaapekto sa ilang panglawas.
Tungod niini, giingon sa labor leader nga samtang wala pa makabalik sa operasyon ang kompanya, kinahanglan una nga tabangan sa management sa Sanjia Steel ang ilang mga empleyado nga naapektuhan sa pagkawala sa trabaho.
Gibutyag usab ni Matula nga padayon silang nakigkoordinar sa DOLE sa Manila aron masiguro nga adunay temporaryong ayuda sama sa TUPAD ug ubang emergency assistance alang sa mga mamumuo samtang wala pa na-normalize ang operasyon sa planta.
