ESTADOS UNIDOS – Natugaw ang Filipino community ug halos tibook Estadus Unidos sa “assassination attempt” kang kanhi US Pres Donald Trump.
Gibutyag kini ni Bombo International News Correspondent Nikko Salvaña Duterte sa interview sa Bombo Radyo.
Miingon si Duterte nga halos dili makatulog ang katawhan human paspas nga mikuyanap sa balita ug social media ang pagpusil kang Trump sa usa ka rehistradong republican voter sa Butler Pennsylvania sa miaging gabii.
Hinoon, daw naibtan sa tunok ug nahanaw ang bug-at nga espekulasyon sa publiko, dihang nadokumentaryo sa pipila ka Trump supporters ang pagkatkat sa suspek sa atop ug ang pagpamusil niini nga wala hibaw-e ug wala sa unod sa intel-report sa Secret Security Service.
Dugtong niini,nakuwestiyon karon ang credibilidad sa mga ahente sa Secret Security Services ubos sa US Security Homeland nga hawid sa gobyerno sa Estadus Unidos.
Gibutyag ni Duterte nga taas ang tsansa nga wala nay mutambong sa campaign sorties ni Trump tungod sa dakung alarma nga nahitabo sa Butler,Pennsylvania.
Miingon si Duterte nga mas daku pa ang venue sa Texas itandi sa Pennsylvania apan gi-anunsyo na sa campaign managers ni Trump nga mabalinada ang iyang iskedyul sa ilang kampanya sa maong estado.
Gani, bisan ang Filipino communities nga nag-obserbar sa dagan sa political rally ni Trump ang mibatig pagduhaduha sa pisikal nga pagtambong niini.(Bombo Anne Quileste).
