Nagpadayon na sa ika-5 adlaw ang gubat sa Middle East, sumala sa eksklusibong interview ni Bombo Senior International Correspondent Bombo Dolly Ilogon gikan sa New York City.
Matod niya, sukad sa pagsugod sa panagbangi, kapin na sa 1,000 ka sibilyan ang namatay. Lakip sa mga report ang 125 ka mga school children nga namatay human mabombahan ang usa ka eskwelahan, nga karon giimbestigahan sa gobyerno sa Estados Unidos.
Nagpabilin usab ang kabalaka sa mga Amerikano tungod kay adunay ilang mga kapamilya nga sundalo nga gipadala sa gyera batok sa Iran.
Anaa usab ang mga turista ug trabahante nga na-stranded sa pipila ka bahin sa Middle East tungod sa nagpadayong tensyon sa rehiyon.
Samtang nagkagrabe ang sitwasyon, gikabutyag usab nga adunay Libo-an ka Iranian-Americans nga kaniadto mibiya sa Iran tungod sa kakulang sa kagawasan ug sa hugot nga pamalaod sa ilang nasud. (Jane Abulag)
