CAGAYAN DE ORO CITY – Misaka sa 70 porsiento ang kaso sa mga tawong nabuthan sa pagsaulog sa pasko ug pagsugat sa bag-ong tuig sa Northern Mindanao region itandi sa miaging tuig 2023.
Kini human misulti si DoH 10 asst regional director David Mendoza nga anaa sa 17 ka kaso na ang ilang natala nga nabuthan sa nagkadaiyang klase sa pabuto ilabina sa pagsugat sa bag-ong tuig.
Mas taas kini itandi sa 10 ka kaso lamang sa rehiyon tuig 2023.
Siya miingon nga kini gilangkuban sa walo gikan sa Bukidnon,upat dinhi sa syudad,tagduha sa Misamis Oriental ug Occidental samtang usa sa Iligan City.
Siya miingon nga lauman ang pagsaka pa niini kay hangtod Enero 6 pa ang monitoring sa ahensiya kabahin sa mga kaso sa nabuthan.
Samtang gihagit ni DoH 10 asst regional director David Mendoza ang local govt units nga ipatuman ang tinud-anay nga istriktong pagdili sa paggamit sa katawhhan sa pabuto matag-saulog sa pasko ug pagsugat sa bag-ong tuig.Kini kon gusto sa local govt officials nga magbaton sa zero casualties sa maong mga kasaulugan.
Giangkon ni Mendoza nga kabahin kini sa kustombre sa nasud apan mas maayo nga dunay mga gabayan sama sa ubang kanasuran nga tinud-anay gidili ang pagpabuto sa kada-indibidwal apan dunay gitukod nga community fireworks area aron mabati gihapon ang kabibo sa kasaulugan.
Sa pikas bahin,gitratar nga generally peaceful sa kapolisan ang pagsaulog sa kapaskuhan ug pagsugat sa bag-ong tuig sa katawhan sa rehiyon.
Kini subay sa ulahi nga assesement sa Police Regional Office 10 nga naka-alerto sa maong mga kasaulugan.
Miingon si PRO 10 spokesperson Maj Joann Navarro nga hinoon,dunay pipila ka duguong hitabo apan wala kini kalabutan sa pang-katibuk-ang seguridad sa rehiyon.
Sa wala pa ang pagsugat sa bag-ong tuig,dunay market vendor ang gipusil-patay sa merkado Cogon ning syudad sa miaging gabii.
Gani,wala usa’y natala nga bisan usa ka pulis ubos sa PRO 10 nga nakahimo’g pagpabuto o indiscriminate firing atol sa pagsaulog sa bag-ong tuig.
Kini ang kompirmasyon sa Bombo Radyo ni Navarro.Apan miingon si Navarro nga dunay nag-inusara nga kaso sa pagpabuto’g armas nga natala sa Iligan City.
Hinoon,siya miklaro nga walay naigo nga tawo atol sa maong hitabo.Hisayrang wala sampungi ang mga armas sa mga pulis sukwahi sa naandan sa dugay’ng panahon.
