CAGAYAN DE ORO CITY, Philippines – Inay si Presidente Ferdinand Marcos Jr., ang iyang kapikas nga si First Lady Liza Araneta ang mu-representar sa Pilipinas alang sa ipahigayon nga World Governments Summit sa Dubai, sa Pebrero 11 kutob 13.
Gikompirmar ni Presidential Communications Office (PCO) Acting Secretary Cesar Chavez ang pagtambong sa first lady.
Makita sa social media post ni Araneta, sa facebook, ang iyang pagpahigayon sa preliminary meeting sulod sa iyang opisina.
Samtang sa iyang instagram, iyang gipa-ambit ang iyang excitement dihang iyang nadawat ang imbitasyon sa summit.
Ang tema sa 2025 World Governments Summit mao ang “Shaping Future Governments.”
Tinguha sa panagtigom ang pagdasig sa managlahing gobyerno, international organizations, mga world leaders, ug pribadong sector sa tibook kalibutan nga magmugna ug mupalig-on sa internasyonal nga kooperasyon, aron masuta ang mga bag-ong sulosyon sa mga dagkung hagit nga muabot, ug mapakusog ang sunod nga henerasyon nga mga gobyerno.
