AMINADO ang Fish Section President sa Cogon Public Market nga si Mercy Trinidad nga nakuratan siya sa unverified report nga adunay napulo ka mga namatay nga giingong nalambigit sa leptospirosis sa maong merkado.
Namahayag si Trinidad sa Bombo Radyo nga wala siya mahibalo kun ngano misaka sa napulo ang gireport nga mga namatay, kay sa iyang pagkahibalo usa lamang ang giingong kaso nga nalambigit sa maong sakit.
Gipunting usab ni Trinidad nga dili garantiya nga sa Cogon Public Market mismo nakuha ang leptospirosis, kay posible kining makuha sa paglusong sa baha ug sa mga kontaminadong tubig.
Midepensa usab si Trinidad nga dili angay ipokus sa fish section ang maong isyu, kay matod pa niya, makanunayon silang nagahimo og washing ug paglimpyo sa isda. Kompyansa usab siya nga limpyo ug luwas ang mga isda nga gibaligya sa Cogon Public Market. (James Oliver)
