Walay gihatag nga ekplanasyon ang mga kontraktor kung nganong nahugno ang 60–70 metros nga bahin sa flood control project sa Zone 2A, Barangay Pagatpat, Cagayan de Oro City human kini subling nakabkab sa tubig baha niadtong miaging Dominggo.
Gipasabot ni Kapitan Gogoy Babaran nga usa kini sa mga rason nganong adunay lima ka tuig nga warranty ang proyekto, tungod kay aduna gyuy posibilidad nga mabakbak ang parte sa dike ilabi na kung taas ang tubig sa Iponan River.
Sa iyang panglantaw, ang kakulang sa kabilya sa maong estruktura maoy hinungdan sa pagkahuyang niini ug mao usab ang nagtugot nga dali ra kini nabakbak.
Human sa miting uban sa mga kontraktor, gihingusgan ni Babaran nga sa pagrepaso ug pag-ayo sa proyekto, kabilyahan na ang maong dike aron malikayan ang susamang insidente.
