CAGAYAN DE ORO CITY – Gusto na sa First Labor of Water o FLOW Union nga mabalik na ang kahapsay ug kalinaw sulod sa Cagayan de Oro Water District o COWD.
Kini ang rason kon nganon naglusad sila sa laing hugna sa prayer rally aron mahatagan sa kaangayan o hustisya ang COWD nga padayong wala lung-i sa kontrobersya.
Namahayag si FLOW Union Pres. Roshelle Jalibas nga pinaagi sa ilang paghangad sa kahitas-an, masaligon sila nga malamdagan ang tanang partido alang sa ikalinaw ug pagpabalik sa normal nga kahimtang sa COWD.
Siya miingon nga wala na sila makagusto sa kasamtang kahimtang sa COWD kay bisan kinsa na lang nga mga taga-lain nga ahensiya sa gobierno ang gasulod-gawas niini.
Una nang nagpadayag sa pagka-dismaya ang FLOW union members kay naipit sila sa bangi tali sa interim COWD officials nga mga tinudlo sa Local Water Utilities Administration o LWUA ug regular board of directors apil sa general manager nga napadaplin tungod sa isyu sa kontrata ngadto sa COBI-MetroPac.
