CAGAYAN DE ORO CITY – Gusto na sa Cagayan de Oro Water District – First Labor Organization of COWD o COWD-FLOW Union nga mabalik na ang kahapsay ug kalinaw sulod sa Cagayan de Oro Water District o COWD.
Kini ang rason kon nganon naglusad sila sa laing hugna sa prayer rally aron mahatagan sa kaangayan o hustisya ang COWD nga padayong wala lung-i sa kontrobersya.
Namahayag si COWD-FLOW Union Pres. Roshelle Jalibas nga pinaagi sa ilang paghangad sa kahitas-an, masaligon sila nga malamdagan ang tanang partido alang sa ikalinaw ug pagpabalik sa normal nga kahimtang sa COWD.
Siya miingon nga wala na sila makagusto sa kasamtang kahimtang sa COWD kay bisan kinsa na lang nga mga taga-lain nga ahensiya sa gobierno ang gasulod-gawas niini.
Samtang gitugot sa balaod ug andam moduyog ang interim officials kon subli mohimo’g prayer rally ang mga sakop sa unyon sa COWD alang sa pagkab-ot hustisya sa ilang kasamtangang kahimtang.
Kini ang tubag ni interim COWD General Manager Fermin Jarales nga naghatag pagtugot sa COWD-FLOW Union nga makahimo’g panagtapok alang sa pagpadayag sa mga sintiminto niini sa kontrobersya nga gisagubang sa ahensiya.
Siya miingon nga bisan sila nga mga tinudlo sa LWUA ang nagkinahanglan usab sa pag-ampo sa tuyo nga makakab-ot sa dinaliang mga sulbad sa daghang problema nga giatubang sa COWD.
