CAGAYAN DE ORO CITY, Philippines – Gipaubos-gamay sa Philippine Rice Information System ang forecast sa gilapdon sa mga humayan nga naapektuhan sa bagyong Carina ug kusog nga ulan dala sa Habagat.
Sa pagkakaron, anaa lang sa 261,674 ka ektarya sa kahumayan ang posibleng maapektuhan, nunot sa hingpit nga paghuyang sa epekto sa bagyo, samtang mihubas ang baha.
Kagahapon kapin sa 421,000 ka ektarya sa humayan ang gibanabana nga nadaut gikan sa standing rice crops apan nius-os kini sa halos katunga o 50%.
Sa kapin sa 260,000 ka ektarya sa mga humayan, anaa sa 26,821 ka ektarya ang nagpabilin sa vegetative stage.
Mukabat sa 228,188 ka ektarya ang anaa sa reproductive stage, samtang kapin sa 6,665 ka ektarya sa humay ang ubos sa ripening stage.
Moabot sa 73 ka ektarya ang naani sa unang higayon bisan sa wala pa muigo ang duha ka nahisgutang kalamidad.
