Mitug-an si Iranian Foreign Minister Seyed Abbas Araghchi nga nakighinabi na kini sa iyang “counterparts” sa Russia ug India bahin sa nagpadayon nga regional conflict nga naglakip sa Estados Unidos, Israel ug Iran.
Sa duha ka bulag nga tawag, gihisgutan nila ang pinakabag-ong kalamboan sa West Asia ug ang epekto sa seguridad ug ekonomiya sa giingong “agresyon” sa U.S. ug Israel.
Gi-detalye ni Araghchi ang mga “krimen” nga gihimo batok sa katawhang Iranian sulod sa 37 ka adlaw, lakip na ang pag-atake sa mga pabrika, ospital, eskwelahan, puy-anan ug nuclear facilities.
Sa iyang bahin, miingon si Russian Foreign Minister Sergei Lavrov nga kinahanglan hunongon ang “illegal” nga pag-atake sa mga sibilyan, samtang gi-pamugos ni Indian Foreign Minister Subrahmanyam Jaishankar ang kahinungdanon sa pagpahiuli sa kalinaw ug seguridad sa rehiyon.
Ang mga tawag nahitabo taliwala sa nagkataas nga tensyon human sa joint U.S.-Israeli strikes sa Iran nga nagsugod niadtong Pebrero 28, nga gisuklihan usab sa Iran ug mga kaalyado niini pinaagi sa pag-atake sa mga interes sa U.S. ug Israel sa tibuok Middle East.
