(Update) CAGAYAN DE ORO CITY-Luwas na karon ang kahimtang ni Fr Teresito ‘Chito’ Suganob kauban ang pipila ka sibilyan sa Marawi City.
Kini ang gihatag nga kompirmasyon ni OPPAP Secretary Jesus Dureza nunot sa pagkaluwas sa militar kang Suganob samtang anaa sa Moske Bato sa main battle area kagabii.
Gibutyag sa Bombo Rady Cagayan de Oro kang Dureza nga limitado una ang gobierno paghatag sa dugang impormasyon kabahin kang Suganob kay anaa pa sa critical stage ang lihok sa mga sundalo nga migukod sa mga teroristang Maute-ISIS sa war zone.
Gibutyag ni Dureza nga maghulat na lamang ang publiko sa pormal nga anunsyo sa AFP ug Malakanyang kabahin sa pagkaluwas ni Suganob.
Si Suganob ang vicar general sa St Mary’s Cathedral ang gihimo nga hostage kuyog ang pila ka trabahante sa mga terorista dihang gilusob sa Marawi City niadtong Mayo 23,2017.
Dumduman nga pila ka higayon nga gisulti sa militar nga gihimo tigluto,tig-silbi,tig-alsa sa mga pusil ug tighimo’gbomba si Suganob dihang anaa pa sa init nga engkuwentro sa war zone sa Marawi City.
