CAGAYAN DE ORO CITY- Gitawag sa hostage survivor nga si Rev Fr Chito Suganob nga simbolo sa kalisang ug kamatayon ang nahitabo nga giyera sa Marawi City takdo magduha ka tuig na ning adlawa.
Kini ang rason nganong nakahukom si Fr. Chito Suganob nga dili una subling mobalik sa maong lugar.
Sa ekslusibong pakighinabi sa Bombo Radyo, gibutyag sa pari nga magpahigayon siya’g misa pasalamat karong adlawa sa ilang lugar sa South Cotabato isip pagsaulog sa iyang kagawasan ug kaluwasan human siya gihimong hostage sa mga Maute-ISIS terrorists.
Samtang giangkon ni Suganob nga wala pa siya hingpit makarekober sa nahitabong Marawi siege taliwala nga duha katuig na ang nakalabay. Siya miingon nga anaa pa siya sa ‘state of recovery’ diin kanunay gabalik-balik sa iyang hunahuna ang iyang mga mapait nga kasinatian sa mga kamot sa mga terorista.
Dugang ni Suganob nga lisod makalimtan ang iyang gibating kahadlok ug kabalaka sulod sa upat ka bulan nga nagsilbi siyang bihag sa mga Maute-ISIS.
Gani, giawhag ni Suganob ang iyang mga kaubang survivor nga kanunay mag-ampo aron hingpit na sila nga makarekober sa ilang mapait nga kasinatian.
