Gihatagan og klaro nga kasayuran ni CAFETADA President Bernie Jamaca nga adunay nahitabong mixed-up sa pag-download sa ayuda alang sa mga taxi drivers.
Tungod niini, pipila kanila nakadawat lamang og ₱1,500 imbes sa gilaumang ₱5,000 nga subsidy.
Sumala ni Jamaca, sa ilang pagpadangat sa buhatan sa LTFRB, gitin-aw ni LTFRB-10 Director Aljo Bendijo ang maong hitabo ug giila nga adunay sayop sa proseso sa kaulohan sa paghatag sa ayuda.
Matod pa ni Jamaca, gi-awhag karon sa LTFRB ang mga apektadong drayber nga mosumite sa ilang OR/CR, lisensya ug text confirmation aron ma-update ang ilang rekord ug makuha nila ang kulang nga ayuda sa labing madali nga panahon.
Dugang pa niya, ang nahibiling ₱3,500 dako kaayong tabang sa mga drayber nga nagsagubang sa taas nga gasto sa panginabuhi ug pasada karon, busa gilauman nga mabalik dayon kini sa mga drayber.
Gipadayag usab ni Jamaca nga misaad ang LTFRB nga dali nilang lihokon ang pagsulbad sa maong problema.
