CAGAYAN DE ORO CITY – Gilusob sa rebeldeng New People’s Army o NPA ang Bonseta’s Fun Fun Rides nga gipanag-iya sa retiradong army official sa Sitio San Fermin, Brgy. Salocot,Talakag,Bukidnon sa miaging kadlawon.
Kini human tinguha sa mga rebelde nga kuhaon ang mga armas nga gihuptan sa mga tawo nga nagbantay sa maong balay-kalingawan.
Miingon si Talakag Police Station commander Capt Dominador Orate Jr nga nakuha sa mga rebelde ang kalibre 45 ug shotgun sa sekyu nga nagbantay sa maong lugar.
Sa pagsibat sa mga rebelde,na-ambush usab nila ang nag-responde nga sakop sa Regional Mobile Force Batallion apan sakyanan sa sibilyan ang natadtad sa mga bala.
Hinoon,wala maunsa ang mga pulis ug mga sibilyan dihang dunay gipabuto nga landmine ug pagpaulan sa mga bala gikan sa mga rebelde.
Samtang luwas na sa kuyaw nga kahimtang ang sundalo ug Cafgu member nga migukod sa mga rebelde nga unang milusob sa Bonseta’s Fun Fun Rides sa Talakag,Bukidnon.
Kini human nagkasinukliay sa mga bala 1st Special Forces Batallion ug 30 ka sakop sa CPP-NPA sa Brgy San Miguel sa maong lugar.
Miingon si 403rd IB commander Col Ferdinand Barandon nga ang Guerilla Front Committee 68 sa NPA ang gika-engkuwentro sa iyang tropa.
Hinoon,daplis lamang ang mga igo sa iyang duha ka sundalo nga anaa sa Camp Evangelista Station Hospital sa Brgy Patag ning syudad.
Nagtoo usab ang opisyal nga may nanga-igo sa mga rebelde tungod sa mga lama sa dugo nga nabilin sa encounter site.
