GIPASABUT ni Sarah Elago nga ang pagpalabang sa Anti-Political Dynasty Bill dili tumong sa pagtarget sa bisan unsang pamilya o sa pagtapos sa legacy sa usa ka lider.
Ang pahayag sa Gabriela representative gisundan sa mga isyu nga nagkonekta sa maong balaod sa posibleng pagharang kang Vice President Sara Duterte sa iyang pagpadagan sa 2028 presidential elections.
Matod ni Elago, ang tinuod nga katuyoan sa panukalang balaod mao ang paghatag og patas nga kahigayunan ug oportunidad sa katawhan, aron masiguro nga ang liderato dili mapundo sa pipila lamang ka apilido o politikal nga pamilya.
Nagtuo ang Gabriela representative nga daghan ang mga Pilipino nga talento, maalamon, ug adunay kapasidad nga mahimong lider, bisan wala sila naggikan sa popular o impluwensyal nga pamilya sa politika.
Busa, gisuportahan matod pa sa GABRIELA ang pagpasar sa Anti-Political Dynasty Bill aron maablihan ang pultahan sa serbisyo publiko alang sa mas daghang sektor sa katilingban. (James Oliver)
