Wala lantawa sa Gabriela Women’s Party ang impeachment complaint batok kang Bise Presidente Sara Duterte isip political persecution kondili usa ka paagi sa accountability sulod sa demokratikong sistema sa nasud.
Kini ang gipahayag ni Dr. Jean A. Lindo sa iyang interbyu sa bombo radyo diin iyang giingon nga importante nga mapadayon ang impeachment proceedings sa Senado aron mahatagan og hustong proseso ang maong kaso.
Matod pa niya, kung inosente si VP Sara, ang impeachment trial usab ang labing maayong higayon aron mapakita ug mapamatud-an kini pinaagi sa legal ug demokratikong pamaagi.
Gipasabot usab ni Lindo nga delikado alang sa demokrasya kon pasagdan lamang ug walay pagpanubag ang mga taas nga opisyal sa gobyerno tungod kay walay opisyal nga labaw sa balaod.
Dugang pa niya, dili na bag-o ang impeachment sa politika sa Pilipinas tungod kay nahitabo na usab kini sa nangaging administrasyon, busa kinahanglan nga sundon gihapon ang proseso nga gitakda sa Konstitusyon.
