Gisaway sa pundok sa mga kabatan-onan ang pagpamugos sa pipila ka senador nga ipapriso ang mga menor de edad nga nakabuhat og salaod basta naay discernment, apan sila mismo wala makita ang kinatibuk-ang hulagway sa maong isyu sa Children in Conflict with the Law.
Gipunting ni Allysa Ancheta sa Gabriela Youth nga ang problema karon sa criminal liability sa mga bata usa lamang ka repleksyon sa pagkapakyas sa mga magbabalaod sa paghatod sa saktong programa ngadto sa katawhan.
Dugang pa niya, ang korapsyon sa pondo sa gobyerno maoy dakong babag tungod kay imbes nga gastohon sa mga rehabilitation centers ang binilyon nga kuwarta, gipangbulsa lang kini sa pipila ka mga opisyales sa nasod.
Busa, samtang maayo ang tumong sa mga balaod sama sa Juvenile Justice and Welfare Act, dili kini ma-implementar og insakto tungod sa sistemang bulok nga walay igong pagtagad sa mga tawo nga angay makadawat sa maong serbisyo.
