Gitin-aw sa National Union of Peoples’ Lawyers (NUPL) nga ang Senado mismo ang adunay bug-os nga katungod sa pagdesisyon kon pila gyud ka boto ang gikinahanglan aron makasilot sa kasong impeachment batok kay Bise Presidente Sara Duterte.
Gipadayag ni Atty. Ephraim Cortez nga bisan giingon sa Konstitusyon nga duha sa tulo nga bahin sa mga senador ang kinahanglan, gihatagan gihapon sa batakang balaod ang Senado og gahum sa paghimo sa ilang kaugalingong patakaran sa pagdungog.
Gipasabut sa maong abogado nga walay klarong pamaagi sa pagkwenta nga gilatid sa Konstitusyon kon unsaon pag-ihap ang boto batok sa Bise Presidente kon adunay mga senador nga dili makatambong.
Dungan niini, gipamugos sa grupo nga tungod sa maong kakulang sa probisyon, ang mga senador mismo ang may katungod sa pagpasabot ug pagtakda sa eksaktong giya alang sa pagahimong botasyon sa maong kaso.
