CAGAYAN DE ORO CITY – Kakuyog sa kanunay ni Commission on Elections chairman George Erwin Garcia ang regional directors ug ubang provincial officers sa pag-atubang batok sa gipamugos nga pasangil batok kaniya kabahin sa ‘bribery issue.’
Kini human akusahi sa pipila ka politiko nga midawat si Garcia sa bilyones pesos nga komisyon nga giagi sa offshore bank accounts gikan sa kompanyang Miru System Limited Company nga bag-ong server sa 2025 midterm automated elections sa nasud.
Namahayag si Comelec 10 regional director Atty. Renato Magbutay nga gatos-porsiento sila nga nagtoo nga pagguba lang sa dignidad ug kredebilidad sa ilang ahensiya ang katuyuan sa nagpasiugda sa expose batok Garcia.
Siya miingon nga bisan sa mga pasangil nga gihampak sa ilang mga kritiko gamit ang isyu pagpang-suburno, dili kini makabalda sa preparasyon sa Comelec sa eleksyon sunod tuig.
Dugang ni Magbutay nga sa kadugay na niya sa komisyon,kang Garcia pa niya nakita nga dunay sensiro nga tinguha nga may reporma nga mapatuman sa sistema sa eleksyon sa nasud.
Hisayrang sa panahon ni Garcia dunay gitukod nga komitiba sulod sa Comelec nga gitawag kontra-bigay aron ipalig-on ang kampanya batok sa mga politiko nga gapamalit sa boto sa mga botante ug ang mismong mga tawo nga nagbaligya usab niini.
