CAGAYAN DE ORO CITY – Mapinanggaon ug manggihatagon sa iyang isigka-tawo ang kontrobersyal nga kanhi komisyoner sa Commission on Elections o Comelec nga si Atty Virgilio Garcillano nga gitumbok nga utok sa Hello Garci scandal kaniadto sa 2004 presidential elections sa nasud.
Kini ang paghulagay sa iyang kapikas nga si Gresilda Garcillano dihang naabtan sa Bombo News Team nga nagbantay sa haya niini sa kanhi opisyal sa Saint Peter’s Chapels sa Brgy Lumbia ning syudad.
Miingon si Ginang Garcillano nga sukwahi sa paghulagway sa pipila,matarong ang iyang kapikas ug dali maduulan sa ilang mga kabanay ingon man mga silingan sa gipuy-an niini sa Brgy Imbatug,Baungon,Bukidnon.
Saysay niini nga ang kawad-on sa hangin subay sa mga mananambal nga nag-atiman aron unta maluwas pa si Garcillano ang hinungdan nga hingpit kining naputlan sa ginhawa niadtong Sabado sa gabii.
Gikompirmar sa iyang misis nga kalit natumba sulod sa pansayan ang 87 anyos nga bana niini ug wala na maluwas ang kinabuhi.
Dumduman nga nagsugod ang kontrobersya ni Garcillano dihang gitudlo kini nga nakig-konsabo sa kanhi presidente ug karon Pampangan Congresswoman Gloria Arroyo aron masiguro ang kadaugan niini batok sa namatay na usab nga si TV action star Fernando Poe Jr o FPJ sa 2004 presidential elections.
Gitakdang ilubong ang patay’ng lawas sa kanhi opisyal sulod ning semanaha sa menteryo duol sa kapilya diin kini nakahaya.
Tipik sa nakaduaw sa haya ni Garcillano si kanhi City Mayor Oscar Moreno kinsa kaila usab sa maong pamilya kaganihang buntag.
Hisayrang napugos pa paglalin una sa laing nasud ni Garcillano ug mibalik lang sa Pilipinas dihang mihupay na ang kainit sa isyu.
