CAGAYAN DE ORO CITY, Philippines – Layo pa’s kamatuoran ang ambisyon ni Retired Police Colonel Royina Garma nga mahimong state witness sa Extra Judicial Killing (EJK) sa duguong ‘War on Drugs’ ni kanhi Presidente Rodrigo Duterte.
Gitataw sa Department of Justice (DOJ) nga dunay mga sukdanan ang DOJ aron itudlo ang usa ka akusado isip testigo, ug kung mahimo ba silang ipa-ubos sa Witness Protection Program (WPP).
Namugos si Atty Mico Clavano, Assistant Secretary ug Spokesperson sa ahensya nga dili otomatic ang pagka-star witness ni Garma bisan pa’g otomatik nga gidawat sa House of Representative Investigating body ang kalit nga pag-implikar ni Garma kang Duterte isip utok sa tanan summary killings sa Cebu City, sa Davao ug posible, sa tanan lugar sa Pilipinas nga dunay mga nasang-at nga kaso kalabot sa EJK.
