Gipaubos sa random drug testing ang 102 ka drayber ug konduktor sa mga pampublikong transportasyon sa syudad atol sa pagsugod sa Semana Santa ubos sa Oplan Harabas sa PDEA‑10. Kini nga operasyon kabahin sa mandato sa kapulisan ug PDEA personnel matag espesyal nga holiday sama sa Semana Santa diin dagsa ang mga pasahero sa mga terminal.Sumala ni Willie C. Dacula, Acting Information Officer sa PDEA Region 10, ang operasyon gipahigayon kauban ang Land Transportation Office (LTO), Land Transportation Franchising and Regulatory Board (LTFRB), Philippine National Police (PNP) ug Highway Patrol Group. Target niini ang mga drayber sa bus, jeepney, van, tricycle ug uban pang public utility vehicles sa nagkadaiyang terminal sa syudad.Gipasabot usab ni Dacula nga gikan sa 102 ka indibidwal nga gi‑random drug test, usa ka van driver ang mipositibo sa methamphetamine hydrochloride o shabu.
Sa laing bahin, gibutyag sa PDEA‑10 ang detalyadong ihap sa mga drayber ug konduktor nga gipaubos sa random drug testing. Sa eastbound o Agora terminal, mikabat sa 50 ka indibidwal ang na‑drug test nga gilangkuban sa 49 ka drayber ug usa ka konduktor. Samtang sa westbound Bulua terminal, miabot sa 52 ka indibidwal ang naapil nga naglakip sa 46 ka drayber ug unom ka konduktor. Kini nga mga numero maoy nagkompleto sa kinatibuk‑ang 102 ka drayber ug konduktor nga gi‑drug test ubos sa Oplan Harabas.Sa katapusan, giingon ni Dacula nga hapsay ang ilang operasyon ug padayon kini ipatuman aron masiguro ang kaluwasan sa mga pasahero.
