CAGAYAN DE ORO CITY – Gisugat sa dakong trahedya ang gatusang pamilya tungod sa sunog sa mga puy-anan sa Zone 3,Agora, Brgy Lapasan ning syudad.
Gibutyag ni Bureau of Fire Protection Cagayan de Oro District Operation Division head Fire Insp Kyle Bryan Lauzon nga nagsumikad ang kalayo sa balay ni Cerilio Sumalpong ug paspas mikaylap sa mga silingan kagahapon sa hapon.
Gikompirmar usab ni Lauzon nga adunay minor de edad nga naangol sa hitabo.Mitala sa dili moubos sa 150 ka puy-anan ang nalamoy sa kalayo diin adunay 1.5 milyones pesos sa structural damage.
Naglisod sa pagsulod ang mba bombero tungod sa kagamay sa dalan sa nasunugan ang kusog usab nga huyop sa hangin.
Samtang mihangyo’g dugang tabang si Lapasan Punong Brgy Julito Ogsimer alang sa mga biktima sa sunog sa Zone 3,Agora ning syudad.
Kini tungod kay dili igo ang pondo nila sa brgy ug bisan ang ayuda gikan sa city hall ngadto sa mga biktima.
Miingon si Ogsimer nga kutob lang sa usa ka semana ang kaya sa brgy aron mahatagan sa batakang panginahanglan ang mga pamilya nga apektado sa sunog.
Kasamtangang gipahimutang ang mga biktima sa designated evacuation center sa brgy samtang naghulat sa dugang tabang gikan sa nagpakabanang katawhan.
