CAGAYAN DE ORO CITY-Nanghikling ang dul-ag libo ka residente o gatusang pamilya tungod sa pagsaka sa tubig-baha sa pipila ka lungsod sa Misamis Oriental kaganihang buntag.
Kini human misulod ang mga tubig-baha sa mga balay ilabina sa lungsod sa Lagonglong, Balingasag, Claveria ug Tagoloan ning lalawigan.
Gibutyag ni Misamis Oriental PDRRMD head Fernando ‘SotSot’ Dy Jr nga apektado usab ang mga motorista gikan sa syudad padulong sa Caraga Region tungod sa paghuyang sa pundasyon sa Musi-Musi bridge sa Balingasag ning lalawigan.
Ang mga pag-ulan ang epekto sa presensiya sa bagyong Urduja nga ulahing nasiplatan sa Eastern Visayas Region.
