CAGAYAN DE ORO CITY-Apektado ang 200 ka residente o sobra’g 50 ka pamilya sa sunog sa Zone 6, Gumamela Extension, Brgy Carmen sa syudad.
Gitumbok ni SFO1 Imelda Barasan, imbestigador sa Bureau of Fire Protection o BFP nga gitoohang nagsugod ang kalayo sa ikaduhang andana sa balay ni Monica Sevilla nga nagpuyo sa maong lugar.
Matud ni Barasan nga misaka na sa 26 ka panimalay ang naabo sa sunog.
Kabahin sa ilang gilantaw nga hinungdan ang napasagdan nga charger nga naka-charge sulod sa kwarto.
Hisayran nga moabot sa P500,000 ang damyos sa sunog.
Giangkon ni Sevilla nga sa iyang panimalay nagsugod ang pag-ulbo sa kalayo.
Apan, gitin-aw niini nga wala siya’y kasayuran kung aha nagsumikad ang sunog.
Giangkon usab ni Sevilla nga adunay bata nga nabilin sa kwarto kung aha nagsugod ang kalayo.
Samtang tun-an pa sa lokal nga kagamhanan sa syudad kon ipaubos sa state of calamity ang Barangay Carmen nunot na sa pagkaugdaw sa 26 ka panimalay.
Sumala ni City Vice Mayor Kikang Uy nga daghang konsiderasyon ang ilang lantawon ug lakip na niana ang gindaghanon sa mga biktima sa sunog.
Gipasalig ni Uy nga motabang ang lokal nga kagamhanan sa Brgy Carmen sa paghatag ayuda sa mga nasunogan.
Gawas niini naugdaw usab ang duha ka andanang apartment nga gipanag-iya sa pamilyang Salon sa 7-17th Streets, Brgy Nazareth ning syudad kaganihang buntag.
Kini human nag-ulbo ang kalayo diin nadamay ang pamilyang Go nga nag-okupar sa maong gambalay.
Gibutyag ni SFO1 Barasan sa BFP nga gisuta pa nila ang hinungdan sa maong sunog.
Hinoon,walay tawo nga nalukong kay paspas nakagawas dihang nahitabo ang sunog.
Natala sa balor gatos-mil pesos ang inisyal nga damyos sa sunog.
