CAGAYAN DE ORO CITY- Nakatilaw sa pagsaway gikan kang City Vice Mayor Kikang Uy si City Councilor Atty. Lordan Suan.
Kini tungod sa reklamo nga gipasaka sa kampo ni Suan ngadto sa DILG batok kang Uy.Unod sa reklamo sa kampo ni Suan ang giingong wala pagpirma ni Vice Mayor Uy sa appointment sa duha ka job order sa konsehal nga sila si Eric Alcantara ug Alfon Duyo.
Sa ilang regular session kagahapong adlawa, gibutyag ni Uy nga dili mahimo iyang aprobahan ang appointment sa duha ka job order kay sukad niadtong bulan sa Setyembre sa miaging tuig, wala siya nakakita sa ilang attendance sheet.
Dugang ni Uy nga dili usab niya pwedeng pirmahan ang appointment sa dugang lima ka job order ni Suan kay pulos kini mga sakop sa iyang pamilya.
Si Uy namahayag nga usa ka matang sa nepotismo ang gihimo ni Suan, busa wala niya pirmahi ang aplikasyon sa maong mga job order kay nakasupak kini sa balaod. Samtang gipanghimakak ni Suan nga siya ang miduso ug reklamo sa DILG batok kang Uy.
Sa pakighinabi sa Bombo Radyo, gibutyag ni Suan nga ang iyang duha ka job order nga sila si Alcantara ug Duyo maoy nagduso sa reklamo ug dili siya.
Si Suan miingon nga ang wala pagpirma ni Uy sa appointment sa iyang mga job order, nagpakita sa iyang pag-abuso sa gahom ug dili epiktibong pagdumala sa konseho.
Gipanghimakak usab ni Suan nga may nahimo siyang nepotismo kay igo pa lamang nagduso sa ilang aplikasyon isip mga job order ang pipila ka sakop sa iyang pamilya gipanganlan sa bise mayor.
