NAGATOO ang PMTC Institute of Iranum Studies, genealogist ug paleographer nga si Nasser Sharief, CPA, nga aduna pay kakulangon sa pagsabot ang pipila ka senador sa nasud kabahin sa historical claims sa Pilipinas sa West Philippine Sea.
Sumala ni Sharief, pinaagi sa iyang academic book nga “The Iranum and Philippine Historical Claims about the South China Sea,” masabtan pa unta sa mga senador ug sa katawhang Pilipino ang lig-ong baruganan nga angay ipangdepensa sa nasud sa nagpadayong panaglalis tali sa Pilipinas ug China kabahin sa maong teritoryo.
Si Sharief, nga mao usab ang tagsulat sa libro ug usa ka historyador, miingon nga naghinaot siya nga mapansin ug hatagan og seryosong pagtagad ang iyang pagtuon sa mga magbubuhat og balaod.
Matod pa niya, nakahatag na siya og kopya sa iyang libro sa pipila ka senador aron mas mapalapdan pa ang ilang pagsabot ug baruganan sa dugay nang gipanaglalisang dagat.
Gidugang pa ni Sharief nga naghinaot siya nga susihon usab sa gobyerno sa Pilipinas ang iyang mga argumento, sama sa gibuhat sa ubang nasud nga nagpakita na og interes sa iyang pagtuon.
Giingon niya nga ang iyang mga konklusyon gibase sa kasaysayan ug dili supak sa UNCLOS ug uban pang internasyonal nga balaod nga naglatid kung kinsa gayud ang may lehitimong pagpanag-iya sa West Philippine Sea.
