Gipun-an pa ni PNP chief General Nicolas Torre III ang kainit sa hisgutanan nga hayan magka-engkuwentro sila ni Davao City Vice Mayor Sebastian ‘Baste’ Duterte gamit ang ilang mga kusog nga mga kinomo ibabaw sa boxing ring.
Kini human mikatag ang video clip diin makita ang heneral nga mihimo sa light boxing training agi’g dugang tubag sa unang mikaylap na nga gitoohang pasingot ni Baste diin gidudahan nga nagsumikad ang ideya nga sila magbahug-bahog na lang sa mga kinomo.
Dumduman nga gidawat ni Torre nga magboksing sila ni Baste apan pinaagi sa ‘fund raising’ concept kay ang tanang kitaon sa ilang dose ka hugna nga pagsumbagay e-donar sa mga biktima sa grabeng kalamidad nga miigo sa daghang lugar sa Luzon ug mismo sa mga syudad sa Metro Manila.
Gani, si Torre pa ang mipartida nga magtigi sila ni Baste sa Smart Araneta Coliseum sa adlaw’ng Domingo ug matag- round sa ilang away lahi-lahi ang boxing sponsors.
Una nang miani sa daghang komento ang boxing issue sa duruha diin adunay social medial netizens nga gusto nga tinud-on ang ilang away apan ang uban nagtoo nga kutob lang sa estorya.
Sa miaging interbyu kang Baste, gihagit niya ang heneral nga iagi sa boksing ang ilang panagbikil kay wala daw siya’y dag-anan sa pagsilbing dakong opisyal sa PNP niini.
Hisayrang lawom ang panagbangi sa duruha kay si Torre ang gisugo’g dakop kang kanhi Pres Rodrigo Duterte ug paspas gipadala sa Netherlands kay adunay kasong crimes against humanity epekto sa unom ka tuig na war on drugs policy niini sa Pilipinas.
