Nagpadayag sa kabalaka si Prof. Lucanus Azrael Igot, usa ka geopolitical analyst, tungod sa nagpadayon nga pagpang-atake ug pag-contain sa United States ug Israel batok sa Iran.
Gibutyag ni Igot, siya naglaom nga dili kini moresulta sa usa ka full-scale war nga makapalala sa kahimtang sa rehiyon.
Matud pa niya, delikado ang kahimtang sa seguridad sa mga katawhan sa Middle East kon mosamot pa ang kagubot ug mosangpot sa mas dako nga armadong panagsangka.
Gipasiugda usab ni Igot nga ang paglala sa sigalot mahimong makaapekto sa kalinaw ug kaluwasan sa mga sibilyan nga anaa sa maong mga nasud.
Nabalaka usab siya sa kahimtang sa mga Pilipino, ilabi na ang mga overseas Filipino workers nga nagtrabaho ug nagpuyo sa Middle East.
Sa pagkakaron, nagpadayon ang pagbantay sa internasyonal nga komunidad sa posibleng mga sunod nga kalamboan sa maong tensyon. (James Oliver)
