CAGAYAN DE ORO CITY – Nalubong sa katapusang pahulayan ang giila sa Archdiocese sa Cagayan de Oro nga ‘versatile priest’ nga si anhing Rev. Msgr Elmer Abacahin,PC,SSJV sa lubnganan sa mga pari sa Brgy Camaman-an ning syudad kagahapon sa buntag.
Kini human panguluhi ni Archbishop Jose Cabantan,D.D,SSJV ang ‘requim mass’ alang kang Abacahin nga gitambungan sa daghang mga pari ug mga parokyano sa San Agustin Cathedral ning syudad.
Miingon si Cabantan nga sa wala pa hingpit nasayran nga nagsakit si Abacanhin sa kanser,mihimo una kini sa public admission atubangan nila nga mga pari sa tanan niyang mga kakulangon ug kasal-anan.
Si Abacahin nga nag-edad an na sa 69 ang lumad taga-Talisyan,Misamis Oriental.
Hisayrang ayha wala naghupot sa bisan unsa nga dagkong katungdanan si Abacahin, daghang mga sugo sa simbahan ang nahatagan niini sa katumanan ug nakahimo’g mga repormasyon aron mapalig-on ang pagtoo sa mga Kristiyano nga ubos sa iyang paggiya.
