Nagpahayag og kabalaka si Asian Criminological Society President Gerry Caño kabahin sa giingong padayon nga pagpangita og paagi sa kasamtangang administrasyon aron mapersekutar ang mga kontra niini, lakip si Vice President Sara Duterte ug kanhi Presidente Rodrigo Duterte.
Matod niya, ang gahom sa gobyerno naggikan sa soberaniya sa katawhan ug ang mga opisyales sa nasud kinahanglan maghatag og tumang respeto sa tingog sa publiko nga maoy mipili kanila sa puwesto.
Sumala ni Caño, makita karon ang dakong paningkamot sa gobyerno sa pagpahimutang og mga kaso batok sa mga dili kaalyado sa administrasyon, samtang ang mga problema ug sayop nga nahimo sa kasamtangang panggamhanan gipasangil lamang ngadto sa bise presidente ug sa kanhing pangulo sa nasud.
Dugang pa niya, nagkadaghan ang mga kasong gilambigit sa administrasyon apan wala pa gihapoy klaro ug konkretong aksyon nga nahimo ang gobyerno aron masuta ug masilotan ang mga responsable niini.
Busa nanawagan si Caño nga kinahanglan magpabiling matinud‑anon ang gobyerno sa prinsipyo sa demokrasya ug sa pagrespeto sa katungod ug tingog sa katawhan.
