CAGAYAN DE ORO CITY-Wala gayud nakatilaw sa bisan usa ka kadaugan ang Gilas Pilipinas sa 2019 FIBA World Cup didto sa China.
Kini human sila pukana sa Team Angola pinaagi sa overtime game sa final score nga 81-84 kagahapong adlawa.
Gusto unta sa Gilas nga makabawi sa ilang mapait nga kaparutan kontra Team Italy ug Team Serbia apan napakyas sila pagpukan sa Angola.
Nakaapas pa unta ang Gilas sa 11 puntos nga labaw sa Angola sa 4th quarter apan mitigbabaw ang maayong opensa ug depensa sa Angola sa pagtapos sa time regulation ug overtime nga nagresulta sa ilang kadaugan.
Si Andray Blatche maoy top scorer sa Pilipinas sa iyang 23 points ug 12 rebounds ingon man si CJ Perez sa iyang gitunol nga 17 points.
Samtang ang African team gipanguluhan ni Valdélicio Joaquim sa iyang 20 points.
Tungod sa kaparutan, nahanaw ang pangandoy sa Pilipinas nga ma-qualify sa 2020 Tokyo Olympics.
Ang Gilas gilayong mobiyahe padulong sa Beijing alang sa classification match diin sila makigsangka sa Team Iran ingon man sa magmadaugon tali sa Puerto Rico ug Tunisia sa Group N.
