CAGAYAN DE ORO CITY – Pursigido ang Gilas Pilipinas nga makabawi sa ilang kaparutan dihang daw gi-masaker sila sa mga magdudula sa Italya sa China sa miaging Sabado sa gabii.
Kini human makig-harong na usab ang Gilas sa no.4 sa world ranking sa FIBA World Cup nga Serbia sa China unyang gabii.
Miingon si Gilas coach Yeng Guiao nga buhaton nila kutob sa ilang mahimo aron lamang makabawi sa kaparutan kontra sa Italya sa score 108-batok 62.
Giangkon ni Guiao nga ang Serbia ang usa sa pinakalig-on nga atubangon sa Gilas aron lamang makapadayon sa sunod nga torneyo.
Target sa Gilas nga modikit sa dula ug pakuratan nga labwan ang Serbia pag-abot sa katapusang bahin sa ilang dula unyang gabii.
Nasayran nga ang Serbia ang nagbaton sa NBA players nga si Nikola Jokic ug Boban Marjanovic samtang ang Gilas bugtong si naturalized player Andre Blatche lamang.
