CAGAYAN DE ORO CITY – Gipangita sa kapolisan ang lalaki nga suspek pagpatay sa usa ka babayeng minyo nga unang gika-check in niini sa Homewood Pensionne House sa Brgy Barra,Opol,Misamis Oriental.
Kini human gitoohan sa kapolisan nga gipatay niini ang 28 anyos nga biktima nga si Samera Marayan igo pagtibawas nila sa paghilawas sulod sa motel kagahapong adlawa.
Gibutyag ni Police Staff Sgt Mark Arthur Reyes,imbestigador sa Opol PNP nga mismo ang wala una panganli nga lalaki ang gikauban ni Marayan pagsulod sa motel diin nakuhaan sa CCTV.
Nadiskobre sa kapolisan nga gigapos ang mga kamot ug tiil sa biktima diin gitoohan nga namatay kay gilumsan gamit ang unlan.
Samtang nakurat pag-ayo ang kaipon sa biktima nga si Samera nga nakit-an na lamang kining patay sulod sa motel.
Miingon si Robert Marayan nga maoy pananghid sa iyang kaipon nga mo-uli una sa pamilya niini diha sa Brgy Camaman-an hinungdan gihatod pa niya kini gikan sa Laguindingan ning lalawigan.
Giangkon ni Robert nga wala siya magtoo nga dunay lalaki nga gika-relasyon ang iyang kaipon ilabina nga nagbaton na sila sa tulo ka anak.
Naglibog pa karon ang maong bana kon unsaon niini pagpasabot sa iyang tulo ka gagmay’ng anak ang nahitabo sa kapikas niini.
