CAGAYAN DE ORO CITY – Gikakurat sa pipila ka residente ang mikaylap nga report nga dunay ginang nga giingong namatay na apan kalit nga nabuhi pipila ka oras paghidangat sa J.R. Borja City Hospital gikan sa Brgy Indahag ning syudad.
Kini human unang gisaysay sa residente nga si Queenie Quimod ang gidangatan sa ilang silingan nga si Elsie Bachenecha kinsa wala na’y panimoot nga gidala sa kaugalingong bana niini padulong sa ospital.
Miingon si Quimod nga unang mikatag ang impormasyon sa ilang mga silingan kabahin sa kahimtang diabetec nga biktima hinungdan nga gikaguol kaayo nila ang hitabo.
Samtang dakong buhi ug padayong nakigbisog batok sa gihambing balatian ang ginang nga unang gikahugon-hugon nga mitaliwala na laing kalibutan diha sa Brgy Indahag ning syudad.
Mismo ang bana nga si Renie Omilao ang mihatag katin-awan nga wala sukad mi-deklara ang doktor sa city hospital nga wala na’y kinabuhi ang iyang kapikas.
Miingon si Omilao nga walay kamatooran ang mikatag nga impormasyon gikan sa ilang pipila ka silingan.
Mihangyo hinoon kini sa iyang mga kabanay ug mga higala nga mohalad sa pag-ampo alang sa kaayuhan sa kapikas niini.
