CAGAYAN DE ORO CITY – Nabulit sa sobrang kayugot ang daghan katawhan gumikan sa dili makiangayon nga kamatayon sa retirado nga trabahante sa korte nga nakabase sa Valencia City,Bukidnon.
Kini human mismo si Valencia City administrator Atty. Genaro Cadigal Jr ang nag-anunsyo nga andam sila mohatag sa 25-mil pesos nga cash reward ngadto sa mga tawo makatudlo sa snatcher nga hinungdan sa kamatayon sa biktima nga si Malou Sapanta nga nagpuyo sa lugar.
Makita sa CCTV footage nga nagbaklay kilid sa dalan ang biktima diin kalit mitunga ang motorcycle riding suspek ug gilayong labnot sa bag niini.
Tungod kay wala nakabantay ang biktima ug sa kakusog sa pagbira sa bag,nalamba kini sa semento diin nawad-an sa panimoot.
Gumikan sa hitabo,gitahasan sa city govt officials ang mga pulis nga pangitaon ug dakpon aron makasuhan ang nakasibat nga suspek.
Kini ang rason nga mitanyag sa 25-mil pesos nga premyo ang city govt alang sa mga tawo nga makatabang pagtultol sa gitaguan sa suspetsado.
Giawhag usab kini nga motahan na lang ug atubangon ang tulubagon niini ngadto sa ginang.
