CAGAYAN DE ORO CITY – Gikaguol pag-ayo sa kagamhanang-lokal sa Gingoog City nga nasayran nga namatay si kanhi City Mayor Marie de lara Guingona ning adlawa.
Kini ang kabahin sa gipalanog ni incumbent Gingoog City Mayor Eric Cañosa kabahin sa gidangatan sa kanhi alkalde sa ilang dakbayan.
Gihulagway ni Cañosa si Guingona nga puno sa dedikasyon,kompasyon ug grasya sa pag-alagad aron makahatag sa kaarangan sa katawhan sa ilang syudad.
Siya miingon nga kung unsa man ang klase sa serbisyo nga puno sa pagkamapa-ubsanon ug gugma sa katawhan ang dili makalimtan kay mapatik man kini sa kasaysayan sa Gingoog.
Gipaabot usab sa mayor kuyog sa katawhan ang ilang pagduyog sa kasub-anan ngadto sa De lara-Guingona clan nga anaa sa pagbangutan gumikan sa pagtaliwan sa kanhi mayor.
Giaghat ni Cañosa ang ilang katawhan nga moduyog sa paghatag pag-ila sa kinabuhi ug legasiya nga gibilin sa mipahulay na nila nga mayor.
Gidasig usab sa kasamtangang mayor ang katawhan nga puy-an ang mga gibilin nga mga maayong gawi nga gipabati sa kanhi mayor tungod ug alang sa handumanan niini ngadto sa mga bag-ong tubo sa ilang pinangga nga dakbayan.
Si Marie ang anak ni kanhi Philippine Vice Pres Teofisto Guingona Jr ug former Gingoog City Mayor Ruthie De lara Guingona.
