CAGAYAN DE ORO CITY – Makig-koordinar si Police Regional Office 10 Brig Gen Rolindo Suguilon sa liderato sa Moro National Liberation Front/MNLF kabahin sa pito ka armadong kalalakihan nga nadakpan pinasikad sa court search warrant implementation sa Purok 15,Brgy Butong,Quezon,Bukidnon sa miaging kadlawon.
Kini taliwala nga nakontak ni Bukidnon Police Provincial Office Director Col.Jovit Culaway ang gitoohang MNLF official diin nagsulti nga mga sakop nila ang nadakpan nga mga suspek.
Gibutyag ni Suguilon nga dili igo ang maong pahayag apan angayang masiguro ang beripekasyon sanglit gilikayan niini nga matandog ang peace agreement tali sa gobierno ug sa lehitimong MNLF nga gipanguluhan ni Professor Nur Misuari.
Siya miingon nga bisan kung tinud-anay nga mga aktibong MNLF members ang mga dinakpan, apan dili sila makalikay sa atrasong kriminal gumikan sa mga armas nga nakuha nga walay mga dokumento.
Una nang gipangayua’g lima ka search warrants sa PNP sa korte ang maong grupo tungod sa mga reklamo sa mga tag-iya sa yuta nga sila gipanghinadlok gamit ang mga gihuptan nila nga mga armas aron mapugos pagbiya sa lugar.
Kini ang rason nga gatusang pulis ang gipakatag sa lokasyon sa mga suspek aron isilbi ang kasuguan sa korte.
Hinoon,walay pagpakita’g kontra-gobierno nga aksyon ang mga dinakpan sanglit gikamang sila sa kapolisan kadlawon sa Agosto 7.
Tipik sa mga nakuha ang 15 ka assorted high-powered firearms nga naglakip sa Colt M16 rifles, M1 Garand rifle, Bipod Ultimax 100 Mark III Cal. 5.56mm,.45 caliber pistols, mga bala, mga granada, battle dress uniforms,paresan sa binoculars ug ubang paraphernalia.
Kasong pagsupak sa Comprehensive Firearms and Ammunition Regulation Act ug Illegal Possession of Explosives ang gipasaka sa kapolisan batok sa mga dinakpan sa piskalya sa Bukidnon.
