CAGAYAN DE ORO CITY – Gipasigarbo sa Globe Telecom, usa ka higanteng telecommunications company sa nasud, ang report nga wala nay dili rehistrado nga sim nga aktibo ning panahona.
Segun ni Darius Delgado, Globe Vice President ug hepe sa Consumer Mobile Business, nga nangulo ang ilang kompanya sa pagpaningkamot nga maseguro nga ang tanan aktibong sim – rehistrado aron malikayan ang lapad nga pagpangilad sama sa text scam, text faud ug uban pa.
Kini nga lakang misubay sa mando sa SIM Registration Act.
Dili tugotan sa Globe ang bisan kinsa nga kustomer nga mugamit sa unregistered sim.
Ubos sa kasamtangang sistema, ang bag-ong SIM ma-activate lang sa higayon nga marehistro pinaagi sa Globe’s SIM registration platforms.
“Among gidesinyo ang among SIM Registration system sa paagi nga walay SIM nga magamit sa network gawas kon narehistro. Busa, ang tanang aktibong SIM sulod sa among network naa sa among sistema. Bisan pa sa atong pagpadayon sa pagpauswag sa atong SIM registration platform, aduna na kitay mga lakang nga nagdepensa batok sa ilegal nga paggamit sa mga dili rehistrado nga SIM,” matud ni Delgado.
Human sa registration period, ang kompanya nagbaton na sa 58.8-M mobile subscribers.
Aron masanta ang malisyoso nga pagamit sa unregistered sim, ang tech-company milusad sa advance protocol sa pag-encrypt sa mga SIM aron masiguro nga ang data nga gipasa maproseso sa pagrehistro.
Atol sa pag rehistro sa sim, ang kompanya migamit sa teknolohiya sa pagkuha sa litrato aron mapugngan ang paggamit sa stock o mga pre-existing nga mga litrato, ug mupugong sa pagdawat sa peke nga mga domunento.
Gipahinumduman sa Globe ang mga SIM users nga mosumiter sa insaktong impormasyon ug photo IDs tungod kay ang pagpasa sa sayop nga impormasyon dunay nag atang nga silot sa balaod.
