Gipangayo ni Atty Kaloi Zarate, kanhi Bayan Muna representative, ang pagpatuman sa mga alternatibong lakang aron masulbad ang krisis sa lana nga giatubang karon sa nasud.
Sumala niya, kinahanglan dayon suspendehon ang excise tax ug tangtangon ang value added tax aron mahatagan og alibyo ang katawhan sa nagkataas nga presyo sa petrolyo ug pamalitonon.
Dugang pa, gisugyot niya nga mopalit og lana ang nasud gikan sa Russia isip usa ka alternatibo tungod sa daghang reserba niini ug posibleng mas ubos nga presyo kumpara sa uban nga merkado.
Busa, giingon niya nga dili dapat magsalig lamang ang nasud sa kasamtangang supply gikan sa ubang nasud sama sa China nga adunay kaugalingong panginahanglan sa petroleum products.
Gidugang niya nga sa long term, kinahanglan usab nga ibalik ang mas lig-on nga kontrol sa gobyerno sa oil industry aron mapugngan ang pagdiktar sa presyo sa merkado.
Sa katapusan, nag-awhag siya sa gobyerno nga maghimo og estratehikong mga lakang aron masiguro ang patas nga presyo sa lana ug maprotektahan ang interes sa katawhan. (By James Oliver)
