Wala mapungot apan nagkatawa si Atty. Antonio Soriano, lead convenor sa Citizens Watch for Good Governance, sa nahitabong kagubot sulod sa Senado sa miaging adlaw.
Sa interbyu sa Bombo Radyo, gihulagway ni Soriano ang panghitabo nga murag mga bata nga nagdagan-dagan sa kagubot ang mga opisyal sulod sa Senado.
Alang kaniya, nagpakita lamang kini og kalibog ug kakulang sa pagsinabtanay tali sa mga tawo nga anaa sa lugar sa maong higayon.
Matod niya, wala siya makakita og timailhan nga adunay aktuwal nga operasyon sa pagdakop kang Senador Ronald “Bato” dela Rosa nga gipahigayon sa mga law enforcement personnel didto sa lugar.
Gidugang pa sa abogado nga daghan lamang kuno ang nangataranta ug midagan tungod sa lain-laing impormasyon nga naglibot kabahin sa nahitabo.
Gipasabot usab niya nga ang sitwasyon nagmugna og kalibog sa publiko tungod sa nagkadaiyang interpretasyon sa insidente.
Bisan pa nga tataw nga adunay pagpabuto og pusil nga nahitabo, kinahanglan matod pa nga klarohon ang mga impormasyon aron malikayan ang dugang nga kalibog ug sayop nga pagsabot sa katawhan.
