CAGAYAN DE ORO CITY-Gihagit karon ni City Mayor Oscar Moreno si Governor Bambi Emano nga mag-atbang sila sa pagka-mayor sa 2019 elections sa syudad.
Gihimo ni Moreno ang hagit tungod sa reaksyon ni Emano nga hustisya alang sa katawhan ang pag-dismiss niini sa Ombudsman gumikan sa kasong kurapsyon.
Miingon si Moreno nga mas pilion niini nga ikasangka si Bambi itandi kang kanhi Mayor Vicente Emano nga makaduha na niya mapildi sa miaging eleksyon sa dakbayan.
Una nang gihimakak ni Governor Bambi nga modagan kini pagka-mayor ug hinoon namulong nga nataranta lamang si Moreno kon tinud-on niini ang pagsulod sa syudad gikan sa lalawigan.
Gitawag pa ni Moreno nga mga masuyaon ang kampo ni Governor Bambi ug kanhi Mayor Vicente Emano.
Kini nunot sa gisulti ni kanhi Mayor Dongkoy nga kutob lamang sa pagka-alyado ug higala sa partido PDP-Laban ug dili miembro sila si Moreno nga nanumpa ning syudad sa miaging Enero ning tuiga.
Miingon si Moreno nga kanunay na lamang gayud puno sa intriga ug pagpangdaot ang mga Emano tungod sa ilang kasuya sa mga kalambuan sa syudad.
Una niini, gibutyag ni kanhi Mayor Emano nga nagkagubot ang panagtigom sa PDP-Laban sa Davao City dihang gisubay nila ang mga kasong kurapsyon ni Moreno sa Ombudsman.
