CAGAYAN DE ORO CITY – Makigsandurot si incoming Misamis Oriental Governor Juliette Uy ngadto sa liderato ni re-elected Vice Gov. Jigjag Pelaez sa higayon nga sila magsugod na sa ilang mga trabaho sa Hunyo 30 ning tuiga.
Kini sa tinguha nga magkahibaw-anay ang buhatan sa duha ka opisyal sa direksyon nga angay sundon nga nagtumong sa pagsilbi sa katawhan sa lalawigan.
Namahayag ang tigpamaba ni Uy nga si Celso Abucejo nga tuyo nila nga latason ang ‘political dynamics’ sa probinsya aron magkatakduay ang ilang mga kagustuhan nga managsama nagtumong sa ikaayo mga Misamisnon.
Nagkahulugan nga bukas si Uy nga makig-uli sa kung unsa man ang panaglahi nila sa politika aron lang makapanukad sila sa pag-alagad sa katawhan nga walay babag sa mga pagpatuman sa mga programa ug serbisyo-publiko.
Apan kung magdumili usab sa pagsanong ang lehislatura sa pangaliyupo sa ehekutibo,monaug sila sa katawhan aron direkta nga ipasabot ang ilang kagustuhan sa panaghiusa.
Giklaro usab niini nga kung ipadayon sa pikas bando nga magtigi sa politika taliwala nga humana ang eleksyon,dili nila pugson apan ngadto na sila sa katawhan mopadayag sa ilang kaakuhan.
Dumduman nga managsama gipukan ni Uy ug incoming Congresswoman Atty. Jennifer Karen Lagbas ang mag-amahan nga si Provincial Gov.Peter Unabia ug anak nga si 1st District Cong. Christian Uy apan usa lang ka board member sa ilang bando ang nakalusot alang sa Sangguniang Panlalawigan sa miaging May 12 elections.
