“Pangutan-a inyong kaugalingon kung wala ba moy sala sa Misamis Oriental!” Mao kini ang gipahayag ni Misamis Oriental Governor Juliet Uy atol sa flag raising ceremony sa kapitolyo probinsyal niadtong Lunes.
Sumala sa pahayag sa gobernadora, direkta niyang gipunting ang pipila ka personahe sa Sangguniang Panlalawigan, ilabina sila Board Member Rommel Maslog ug Board Member Dexter Yasay, nga matod pa maoy nag-ulo sa pagpangdaot sa iyang ngalan kabahin sa isyu sa illegal mining.
Dugang pa niya, padayon ang pagpanghimakak ug pagpang-akusar batok kaniya bisan wala kini lig-on nga basehan.
Giingon usab niya nga andam siyang atubangon bisan unsang reklamo nga ipaabot batok kaniya, bisan pa hangtod sa Kongreso o Senado, aron mapamatud-an ang kamatuoran.
Busa, gipasiugda ni Uy nga mas angay mangutana ang matag-usa sa ilang kaugalingon ug magmatngon sa ilang mga binuhatan imbis magpadayon sa pagpangdaot sa ubang opisyal.
